ეროვნული სასწავლო გეგმებისა და შეფასების ცენტრმა მუშაობა დაასრულა 2011-2016 წლების ეროვნულ სასწავლო გეგმაზე. გეგმის შემუშავებაზე ცენტრის ექსპერტებთან ერთად, მოწვეული ექსპერტები - აკადემიური წრეების წარმომადგენლები და მოქმედი პედაგოგებიც მუშაობდნენ. განათლებისა და მეცნიერების სამინისტროს გადაწყვეტილებით, სწავლა-სწავლების მდგრადობისთვის სასწავლო გეგმა მინიმუმ 5 წლის განმავლობაში არ შეიცვლება.

როგორც ცენტრში აცხადებენ, ახალი ეროვნული სასწავლო გეგმის მთავარი დანიშნულებაა მოსწავლეებს მისცეს ცოდნა, დაეხმაროს უნარ-ჩვევების, ღირებულებებისა და დამოკიდებულებების გამომუშავებაში, პიროვნებად ჩამოყალიბებაში, რომელსაც ანალიზისა და ლოგიკური მსჯელობის უნარი ექნება.

ახალ ეროვნულ სასწავლო გეგმაში ყურადღება გამახვილებულია საბუნებისმეტყველო საგნების სწავლების ახლებურად ორგანიზებაზე. ზუსტი და საბუნებისმეტყველო საგნების სწავლების გაძლიერება კი განათლებისა და მეცნიერების სამინისტროს ერთ-ერთი მთავარ პრიორიტეტს წარმოადგენს.

მათივე თქმით, საბუნებისმეტყველო დისციპლინების სწავლების მიზანია - გააცნოს მოსწავლე   მეცნიერების საფუძვლებს და განუვითაროს  კვლევის უნარ-ჩვევები, რაც მას საშუალებას მისცემს შეიცნოს და გაითავისოს სამყარო, ჩაერთოს საზოგადოებრივი საქმიანობის სხვადასხვა სფეროში, იგრძნოს პასუხისმგებლობა საკუთარი თავის, საზოგადოებისა და  გარემოს მიმართ.

მომავალ თაობებში მეცნიერების პოპულარიზაციის და ზუსტი და საბუნებისმეტყველო საგნების გაძლიერებულად შესწავლის მიზნით ხორციელდება სხვადასხვა ტიპის ღონისძიებები -  მიმდინარეობს სკოლების ეტაპობრივი აღჭურვა ლაბორატორიებით (პროგრამა ”აინშტაინის” ფარგლებში), სადაც მოსწავლეები თავად ატარებენ ცდებს, კვლევებს და სხვა პრაქტიკულ სამუშაოებს. სწავლების პროცესში აქტიურად გამოიყენება ასევე ვირტუალური ლაბორატორიებიც, რაც წარმოადგენს დამატებით სასწავლო რესურსს მოსწავლეებისთვის. ეროვნული სასწავლო გეგმებისა და შეფასების ცენტრის მიერ ტრენინგები ჩაუტარდა ქიმიის, ფიზიკისა და მათემატიკის 150 მასწავლებელს როგორც თბილისის, ასევე რეგიონების 50 საპილოტე სკოლიდან. ცენტრის ექსპერტების მიერ გადამზადებული პედაგოგები თავიანთ სკოლებში  საგნების სწავლების თანამედროვე მეთოდს გამოიყენებენ. სკოლებში პროგრამის დანერგვა და მისი სასწავლო პროცესში აქტიურად გამოყენება მასწავლებლებს  სასწავლო გეგმით განსაზღვრული მიზნების უკეთ მიღწევაში დაეხმარება.

2011-2016 წლების ახალი ეროვნული სასწავლო გეგმის მიხედვით გაიზარდა საბუნებისმეტყველო საგნების სწავლების წლების რაოდენობა. ამ საგნების სწავლება პირველივე კლასიდან იწყება. I-VI კლასებში, საგნის დაწყებით საფეხურზე შეისწავლება საგანი ”ბუნებისმეტყველება”, რომლის ფარგლებშიც მოსწავლეები მიიღებენ ცოდნას გეოგრაფიის, ასტრონომიის, ბიოლოგიის, ფიზიკის, ქიმიის და სამოქალაქო განათლების ზოგად საკითხებზე. სწავლების მეორე - საბაზო საფეხურზე - VII-კლასელი მოსწავლეები ბიოლოგიის, ფიზიკის, ქიმიის საფუძვლების ზოგად კურსს გაივლიან, VIII კლასიდან კი (XI კლასის ჩათვლით) ბიოლოგიას, ქიმიას და ფიზიკას უკვე დამოუკიდებელ საგნებად შეისწავლიან.

საშუალო  საფეხურზე მოსწავლეს შესაძლებლობა ექნება სურვილის მიხედვით აირჩიოს ერთი ან რამდენიმე კურსი საბუნებისმეტყველო მეცნიერებების შემდეგი არჩევითი კურსებიდან: სამედიცინო  ბიოლოგია და ჯანმრთელობა, შესავალი თანამედროვე ფიზიკაში, გარემო და მდგრადი განვითარება, ქიმიური ტექნოლოგიები, ასტრონომია.  

საბუნებისმეტყველო მეცნიერებების სწავლებაში დაინერგა ახალი მიმართულება - მეცნიერული კვლევა-ძიება, რომლის საშუალებითაც მოსწავლეს თავად შეეძლება კვლევითი პროცედურის და მისი ეტაპების განხორციელება, მონაცემების აღრიცხვა, მონაცემთა წარმოდგენა სხვადასხვა საკომუნიკაციო საშუალების გამოყენებით, მათი ანალიზი და შეფასება.

XII კლასში მოსწავლეები შესწავლილ მასალას ”აბიტურის” პროგრამის ფარგლებში  გაიმეორებენ, რაც დაეხმარება მათ როგორც ზოგადი ცოდნის განმტკიცებასა და გაღრმავებაში, ასევე სკოლის დამამთავრებელი გამოცდების წარმატებით ჩაბარებაში.

”თითოეული საგანი, თითოეული საგნობრივი სტანდარტი ემსახურება ერთ გენერალურ მიზანს - მოაზროვნე, სამოქალაქო განათლებისა და შეგნების მქონე ინდივიდის აღზრდას, რომელიც პატივს სცემს სამშობლოს, ადამიანებს, საზოგადოებას და აქვს თვითრეალიზაციის საშუალებები, ანუ ყველა საგანი კომპლექსურად ემსახურება ასეთი მოქალაქის აღზრდას, - ამბობს ეროვნული სასწავლო გეგმებისა და შეფასების ცენტრის დირექტორი ნათია ჯოხაძე, - ერთ-ერთი  მთავარი ფაქტორი, რომელზეც დამოკიდებულია შედეგი  - ხარისხიანი სასწავლო პროგრამებია. ახალი ეროვნული სასწავლო გეგმა კი საკმაოდ რეალისტურია, შექმნილია თანამედროვე მოთხოვნების გათვალისწინებით და მოსწავლეთა საჭიროებებზეა მორგებული”.

წყარო:  http://www.onlinenews.ge