ისევ - ცარცი და დაფა? თუ მხოლოდ კომპიუტერი? როგორი უნდა იყოს თანამედროვე საკლასო ოთახისა თუ აუდიტორიის აღჭურვილობა.ეს საკითხები - მრავალი მეცნიერის, თეორეტიკოსისა და პრაქტიკოსი მასწავლებლის საფიქრალია და ხელმძღვანელის საზრუნავია.

განათლების წამყვანი ამოცანაა - მოსწავლემდე მიიტანოს ცოდნა, რომელსაც ის აღიქვავს და დაიმახსოვრებს კიდევაც. ამისათვის ახალი ინფორმაცია გასაგები და თვალსაჩინო უნდა იყოს. ამ საქმეში კი განსაკუთრებულ ფუნქციას დამხმარე აღჭურვილობა, მოწყობილობა და თვალსაჩინოება ასრულებს. მასწავლებელს ხელთ თუ ექნება გაკვეთილის თემის შესაბამისი მათი საჭირო ნაირსახეობა, ის ილუსტრირებისა და დემონსტრირების დახმარებით უფრო დასამახსოვრებლად მიაწვდის ინფორმაციას, ჩაატარებს ლაბორატორიულ სამუშაოებს.  

სამწუხაროდ, დღეისათვის ბევრ სასწავლო დაწესებულებას თვალსაჩინოება, აღჭურვილობა, ხელსაწყოები და მოწყობილობები თითქმის არ გააჩნია ან გამოუსადეგარი და არქაული შემორჩა. ნებისმიერი არა სპეციალისტისთვისაც ცხადია, რომ მაგალითად:  

-    ნივთიერებათა მოლეკულების მოცულობითი მოდულებისა და კრისტალური კონსტრუქციების, რეაქტივების, ხელსაწყოების და მოწყობილობების გარეშე ძნელია თვალსაჩინოდ ახსნა ქიმიური რეაქციისა თუ ფიზიკური გარდაქმნის მექანიზმი და, მით უფრო, ჩაატარო ლაბორატორიული ცდები;

-    ბიოლოგიის სწავლებაში მნიშვნელოვანია შესასწავლი ობიექტების (ადამიანი, ცხოველი, მცენარე) შიდა აგებულობის ვიზუალური წარმოდგენა;

-    გეოგრაფიასა ან ისტორიაში რთულია, რომ არა ვთქვათ შეუძლებელია, რუკების გარეშე დასამახსოვრებელი ინფორმაციის მიწოდება და ა.შ.

მოდით შევიხედოთ სკოლაში (გამონაკლისი შემთხვევების გარდა) რა გხვდება საკლასო ოთახში - მერხი, დაფა და ენთუზიასტი მასწავლებლის ხელით დამზადებული პლაკატები. რას ვთავაზობთ დაფასთან მდგომ მასწავლებელს მისი შრომის სრულყოფილი ორგანიზაციისა და შემსუბუქების მიზნით - დაფის გვერდით მიაჭედე ლურსმანი ან კავი და ზედ ჩამოკიდე რაც შემოგრჩა ”ნიკოლოზის დროიდან”, ან ის, რის დამზადებაც შესძელი საკუთარი ხელით. როგორ მოვახერხოთ, რომ საკლასო ოთახში შესულმა მასწავლებელმა არ დახარჯოს დრო და ენერგია საჭირო რუკისა ან პლაკატის მოსაძებნად, არამედ, გაკვეთილის თემატიკიდან გამომდინარე, შესძლოს თვალსაჩინოების ოპერატიული და რაციონალური განთავსება.

რომ არაფერი ვთქვათ არასაკმარის ფინანსირებაზე ,დღეს თვალსაჩინოებისა და მოწყობილობის შეძენაც პრობლემად იქცა. საქართველოს ბაზარზე მათი ასორტიმენტი ძალზე მწირია და ხშირად სწავლების შინაარსიდან გამომდინარე არ პასუხობს პედაგოგის და თანამედროვეობის მოთხოვნებს.  

ჩვენი მასწავლებელი - დაუზარელი და დაუქანცავი მშრომელია, მოდით ბოროტად ნუ გამოვიყენებთ მის ენთუზიაზმსა და სკოლისადმი ერთგულებას, ხელი შეუწყოთ კეთილშობილ საქმიანობაში და შეუმსუბუქოთ არც თუ ისე იოლი შრომა.  

ამ მოწოდებით მივმართავთ განათლების მესვეურებსა და მეწარმეებს: განათავსეთ ამ გვერდზე რის შეთავაზება შეგიძლიათ ესოდენ საჭირო ინვენტარის, მოწყობილობების, აღჭურვილობისა და თვალსაჩინოების სახით, ხოლო  ხელმძღვანელებმა განაცხადეთ - რა ესაჭიროება სასწავლო დაწესებულებას!