პორტალზე education.ge გამოქვეყნებული იყო პუბლიკაცია „პედაგოგის წარმატებულობის თვითანალიზი და თვითშეფასება“ . პუბლიკაციამ გამოიწვია ცოცხალი ინტერესი. მას გაეცნო 20 000 - მდე პედაგოგი. ზოგმა მოსაზრებები გამოხატა კომენტარის სახით, ხოლო დიდმა ნაწილმა საკუთარი ხედვა გაგვიზიარა პორტალის სახელზე გამოგზავნილ წერილებში.  

ყველა პედაგოგისთვის კარგად არის ცნობილი, რომ წარმატების მისაღწევად მხოლოდ სპეციალური ცოდნა არ არის   საკმარისი. ცნობილია ისიც, რომ   ყოველი გაკვეთილის მსვლელობის თუ მოსწავლესთან ურთიერთობის ნებისმიერ,   უმნიშვნელო ეპიზოდშიც კი, მასწავლებელს მოეთხოვება დიდი ოსტატობა.

ადამიანის ცხოვრების დიდი მონაკვეთის განმავლობაში, ზოგისთვის კი სიცოცხლის ბოლომდე, მასწავლებელი ყველაზე მნიშვნელოვანი ადამიანი იყო და რჩება. მასწავლებლისა თუ ლექტორის პიროვნების შესახებ უმეტესს არა ერთხელ გვიფიქრია და დაგვიხასიათებია კიდევაც. მაგრამ განგებამ სხვა და სხვა ბუნების, ხასიათისა და თვისებების მასწავლებლები გვარგუნა. როგორია მოსწავლის თვალით დანახული მასწავლებელი?