Education.ge / თანამედროვეობა და ახალი შესაძლებლობები: თვითგანათლებისა და კვალიფიკაციის ამაღლების ეფექტური გზები

თანამედროვეობა და ახალი შესაძლებლობები: თვითგანათლებისა და კვალიფიკაციის ამაღლების ეფექტური გზები

02 მაისი 2010

პედაგოგთა შორის ყოველთვის იყო ცნობილი ჭეშმარიტება, რომ უმაღლესი განათლების მიღების დამადასტურებელი დიპლომის მიღება - ფინიში არაა, ეს - მხოლოდ სტარტია: ცხოვრებისა და პროფესიული გზის ეტაპის მიუხედავად მასწავლებელი ვერასოდეს ვერ მიიჩნევს განათლებას დასრულებულად, ხოლო საკუთარ კონცეფციას საბოლოოდ ჩამოყალიბებულად. პროფესიული საქმიანობის განმავლობაში ის ყოველთვის იმყოფება ძიებისა და თვითგანათლების პროცესში, სწრაფად ცვალებად პირობებში მუდმივად უნდა იყოს მზად ცოდნისა და პროფესიული უნარ-ჩვევების განახლებისა და დახვეწისათვის. მოწინავე ქვეყნების გამოცდილება გვიჩვენებს, რომ თვითგანათლებაში შედეგი მიიღწევა:

- პრობლემატურ საკითხებზე დაკვირვებაში და კვლევით სამუშაოებში მონაწილეობით ;

- სამეცნიერო-მეთოდური და სასწავლო ლიტერატურის შესწავლით;

- სამეცნიერო და სასწავლო-მეთოდურ გაერთიანებებში მონაწილეობით;

- კოლეგების გაკვეთილებზე დასწრებით, მეცადინეობის ორგანიზაციის, სწავლების შინაარსის და მეთოდების თაობაზე აზრთა გაზიარებით;

- გაკვეთილის სხვა და სხვა ფორმების, სასწავლო მასალებისა და კლასგარეშე ღონისძიებების შემუშავებით და პრაქტიკული აპრობაციით.

ამ ქვეყნების გამოცდილება იმასაც გვიჩვენებს, რომ მეთოდური მუშაობის მთავარ ამოცანას სასწავლო საგანში მასწავლებლების ერუდიციისა და კომპეტენტურობის ამაღლება წარმოადგენს, ხოლო თვითგანათლებისა და კვალიფიკაციის ამაღლების განხორციელება პედაგოგთა ქსელური გაერთიანებების მეშვეობითაც არის შესაძლებელი. ყველაზე მარტივი განმარტებით რომ ვიხელმძღვანელოთ, ამ მიზნის მისაღწევად შექმნილი გაერთიანება წარმოადგენს ადამიანთა ჯგუფს, რომლებიც აქტიურად ურთიერთობენ ერთმანეთში და ამ ურთიერთობების, ერთობლივი საქმიანობის მხარდაჭერისათვის კომპიუტერული (ინტერნეტ) ქსელების შესაძლებლობებს იყენებენ. და ეს მიიღწევა იმ შემთხვევაში თუ კომპიუტერული (ინტერნეტ) ქსელი, დოკუმენტების ქსელი („მსოფლიო აბლაბუდა“) და პროგრამული უზრუნველყოფა (სოციალური სერვისები) არა მხოლოდ კომპიუტერებს და დოკუმენტებს აკავშირებენ ერთმანეთში, არამედ აერთიანებენ ადამიანებს, რომლებიც სარგებლობენ ამ კომპიუტერებით, დოკუმენტებითა და სერვისებით. ანუ ქსელური გაერთიანება = მონაწილეების ქმედება + შეტყობინებებით ურთიერთ გაცვლა + სოციალური სერვისები.

გაერთიანებათა ფორმირებისა და არსებობისათვის მნიშვნელოვანია შემდეგი მოთხოვნები:

- საერთო მიზნები, ინტერესები და მოთხოვნილებები;

- გაერთიანების წევრებისთვის ხელმისაწვდომი რესურსები;

- ურთიერთობის საერთო კონტექსტი და ენა, რომლებითაც სარგებლობენ გაერთიანების წევრები.

გაერთიანების მიზნები:

- პედაგოგიური გამოცდილების გაზიარება, ურთიერთ გაცვლა;

- კოლეგებთან სხვა და სხვა ქალაქებსა და რაიონებიდან ურთიერთობა;

- კვალიფიკაციის ამაღლება;

- ახალი ცოდნის შეძენა.

გაერთიანების ძირითადი მახასიათებელი: თანამოაზრეთა კოლექტივი.

გაერთიანებათა სახეობები:

- მონოსაგნობრივი;

- ზესაგნობრივი;

- მულტისაგნობრივი;

- კონკრეტული პრობლემის გადამწყვეტი;

- სერთო, რეგიონალური, მუნიციპალური, სასკოლო;

საქმიანობის ფორმები:

- გაერთიანების ფარგლებში დისტანციური სწავლება;

- არსებული დარგობრივი საიტების მოხმარება, ხოლო არ არსებობის შემთხვევაში ვებ-გვერდების შექმნა;

- ურთიერთობისთვის მიზნობრივი მიმართულების საიტების, ფორუმებისა და ჩატების გამოყენება;

პედაგოგთა ქსელურ გაერთიანებებში იყენებენ საქმიანობის შემდეგ ფორმებს:

- შემსწავლელი სემინარი;

- ვირტუალური კონფერენცია;

- კონკურსი;

- პროექტი, პროექტების ფესტივალი, პროქტირების სემინარი;

- აქცია;

- მასტერ - კლასი;

- გამოკითხვა;

- განხილვა გაერთიანების ფარგლებში, ჩატზე.

თანამედროვეობა ხასიათდება იმით, რომ ადამიანის საქმიანობის ნებისმიერი სფერო, მათ შორის განათლება, უახლესი ინოვაციების დანერგვის შედეგად ვითარდება. განვითარების ამ დინამიკურ პროცესში მასწავლებელსაც მუდმივი ძიება და მეტი შემოქმედებითობა მოეთხოვება, რომელიც შეუძლებელია უახლესი ინფორმაციის უწყვეტი ნაკადის გარეშე. ბევრი ჩვენთაგანი უკვე აქტიურად იყენებს ინტერნეტის შესაძლებლობებს და ვერ წარმოუდგენია მის გარეშე მუშაობაც და თვითგანათლებაც. გარდა ამისა, განათლების სფეროს, სასკოლო ცხოვრების ან სასწავლო-აღმზდელობითი პროცესის რომელიმე მოვლენა ან ფაქტი თანამოაზრეთა წრეში პროფესიულ განხილვას ითხოვს. ხოლო, როგორც პრაქტიკა გვიჩვენებს, ამის უმდიდრეს შესაძლებლობას პედაგოგთა ქსელური გაერთიანებები ქმნიან. ამ გაერთიანებებს კონკრეტული დატვირთვა და ფუნქცია გააჩნიათ. მაგალითად, შემოქმედ პედაგოგთა კონკურსის ”ნოვატორის” ფარგლებში უკვე შექმნილია ხუთი გაერთიანება, სადაც ნომინაციების მიხედვით პედაგოგების ან პედაგოგთა ჯგუფების ნაშრომები განთავსდება და მათი განხილვა გაიმართება. ნებისმიერ პედაგოგს ან პედაგოგთა ჯგუფს ამ გაერთიანებების მაგალითის გაცნობის შედეგად შეუძლია შექმნას თანამოაზრეთა ამგვარი ან სხვა სახის გაერთიანება ან გაწევრიანდეს უკვე არსებულ გაერთიანებაში. ნებისმიერი გაერთიანება შეიძლება ღია იყოს ყველასათვის, აგრეთვე ღია მხოლოდ მისი წევრებისათვის, ანუ სხვებისათვის დახურული. როგორ გაერთიანებას შექმნით ან რომელში გაერთიანდებით ეს მხოლოდ თქვენი გადასაწყვეტია. გისურვებთ წარმატებას!