ბავშვობაში, როცა ყირაზე მდგარ მომავალ პოეტს შეხვდა, გოგონამ(პოეტმა Jacintha Buddicome) უთხრა „ მაშინ უფრო ხარ შესამჩნევი   როცა ყირაზე გადიხარ, ვიდრე მაშინ, როცა „სწორ“ გზაზე დადიხარ“("You are noticed more if you stand on your head than if you are right way up.") ..

თითქოს სწორი, ადაპტირებული გზით მიდიოდა ერიკ არტურ ბლერის ცხოვრება; ინდოეთში, ბრიტანული წარმოშობის ოჯახში დაიბადა, ცხოვრობდა ლონდონში, პარიზშიც.. სწავლობდა შეძელბისდაგვარად, არ უყვარდა სკოლა, იზრდებოდა, დაქორწინდა, იბრძოდა ესპანეთის სამოქალაქო ომში რესპუბლიკელების მხარეს, მუშაობდა ჟურნალისტად, სტატიებს წერდა, მეორე მსოფლიო ომში(ვერ იბრძოლა) ბიბისისთვის მუშაობდა... იცოცხლა და ბოლოს ტუბერკულოზით მოკვდა.

„ყირაზე გასული“ ერიკ არტურ ბლერი კი ჯორჯ ორუელის სახელით გაიცნო სამყარომ. ჟურნალისტმა, პუბლიცისტმა, ესეისტმა წიგნებში ააყირავა, ადამიანების მიერ კრიტიკის გარეშე მიღებული და „მორგებული“ სამყარო და ბევრს აუხილა თვალები. თავისი დროის ყველაზე გაყიდვადი მწერალი, 21ე საუკუნეშიც ერთ-ერთი ყველაზე აქტუალურია იმ პრობლემატიკის წყალობით, რომელსაც ეხება.

ორუელის „ცხოველების ფერმა“ს წიგნის მაღაზიებიც და თბილისელი ბუკინისტებიც ერთნაირად სწყალობენ. უნდა ითქვას, რომ წიგნის ასეთი სიმრავლე, გაუსაღებლობაზე უფრო, მისი აქტუალურობის ბრალია. ორუელის მიერ შექმნილ სამყაროში ყველა ცხოველი თანასწორია, თუმცა ზოგიერთი უფრო თანასწორია და ასეთი ზოგიერთები ქმნიან მეორე ბესტსელერში „1984“ დიდი ძმის სახეს.  1949 წელს გამოცემულ უტოპიურ რომანთან ერთად დაიბადა ახალი ცნებები; უფროსი ძმა(რომელიც მუდმივად გითვალთვალებს_Big brother), აზრის პოლიცია(რომელიც აკონტროლებს აზრების „ნორმასთან“ შესაბამისობას_thought police), აზრკრიმინალი(აზრი, რომელიც დანაშაულია და ისჯება_thoughtcrime), ორაზრი(doublethink)... ორუელმა ტოტალიტარული სამყარო ააყირავა და დამალული, წართმეული თავისუფლება გამოაჩინა.  

New American Oxford dictionary-ში ნახავთ სიტყვას Orwellian, რომელიც ზედსართავი სახელია, მეოცე საუკუნეში გაჩნდა ლექსიკონში და მოკლედ ასე შეიძლება განიმარტოს- მმართველების მიერ გაკონტროლებული და დაშინებული (საზოგადოება), როცა მმართველი კონტროლისა და დაშინებისთვის, პირადი ცხოვრების სხვადასხვა ასპექტში(ც) უხეშად ერევა. უფრო ვრცელი და ამომწურავი განმარტება თუ გნებავთ, ჯორჯ ორუელის შემოქმედებას, ან სულ მცირე „1984“ს უნდა გაეცნოთ.
ასე შეამჩნია, ყირაზე გასული ორუელი მსოფლიომ და ცნებად აქცია.