მშობელმა უნდა იცოდეს, რომ ამ ასაკის ბავშვთა დაავადებებში ყველაზე ხშირია მწვავე რესპირატორულ-ვირუსული და ნაწლავური ინფექციები, სასუნთქი ორგანოების დაავადებები (ბრონქიტები, ბრონქო-პნევმონიები). აგრეთვე, განსაკუთრებით ლიმფატიური დიათეზისა და იმუნოდეფიციტური მდგომარეობის მქონე ბავშვებში, ხშირად გხვდება ადენოიდებისა და ნუშისებრი ჯირკვლების ჰიპერპლაზია თანდართული ანთებითი პროცესებით. აგრეთვე ხშირად შეინიშნება სხვა და სხვა ფორმის ალერგიული და დიათეზური მოვლენები, ნერვიული სისტემის (ნევროზები, ნევროპათიები, ენურეზი) დარღვევები, ასევე ხშირია მედიკამენტოზური, საყოფაცხოვრებო და ა.შ. მოწამვლები, დამწვრობები და ტრავმატული დაზიანებები.
    დაავადებების სიხშირე იზრდება ბაგა-ბაღში და სკოლაში მიყვანის საწყის ეტაპზე. მისი თავიდან აცილებისათვის წინმსწრებ ზომებში საჭიროა გავითვალისწინოთ გამოვლენილი ყველა კერის სანაცია და ჯანმრთელობაში გადახრების მკურნალობა, იმუნოლოგიური სტატუტის ამაღლება, ცხორების ახალი რეჟიმისათვის ბავშვის ფსიქოემოციური მომზადება.
    როგორც გვიჩვენებს პრაქტიკა ბავშვთა ამ ასაკობრივ კატეგორიებში ყველაზე მეტად გავრცელებულია რესპირატორულ-ვირუსული ინფექციები, აგრეთვე ე.წ. საბავშვო ინფექციები (წითელა, ჩუტყვავილა და ა.შ.), რომელთა საწინააღმდეგოდ ბავშვი არ გვყავდა იმუნიზირებული. ხშირია ქრონიკული ტონზილიტები, კუჭ-ნაწლავის მოშლილობები, აგრეთვე ალერგიული ხასიათის დაავადებები, ნევროზები, სხეულის აღნაგობისა და მხედველობის დარღვევები.
    მაგრამ დამახასიათებელ დაავადებებში ყველაზე მაღალია რესპირატორულ-ვირუსული დაავადებების ხვედრითი წილი, რომლებსაც უმეტესად იწვევენ გრიპის, სხვა და სხვა ჯგუფის ვირუსები. ამ ფონზე სკოლამდელი და უმცროსი სასკოლო ასაკის ბავშვებს ხშირად უვითარდებათ ბრონქიტები და ბრონქიოლიტები, ადრეულ ასაკში კი - მწვავე პნევმონიები. მკურნალი პედიატრი ადვილად დაადგენს რესპირატორული (მათ შორის განმეორებით) ინფექციების გამომწვევ მიზეზებს. უმეტესწილად მათ განაპირობებს მეორადი იმუნოდეფიციტური მდგომარეობა, ვინაიდან იმუნური სისტემის მომწიფება ამ ასაკის ბავშვებში ჯერ არ არის დასრულებული.
    ჩამოთვლილი დაავადებების უმეტეს ნაწილს იწვევენ და განაპირობებენ სანიტარულ-ჰიგიენური რეჟიმის დარღვევები, ბავშვის არა რაციონალური კვება, ოჯახის წევრებისა და გარემოცვის ქრონიკული დაავადებები, თვით ბავშვის პროგრესიული დაავადებების მკურნალობის კურსის დაუსრულებლობა და ცუდი რეაბილიტაცია. ბავშვის ამ ასაკში განსაკუთრებული მნიშვნელობა აქვს ჩამოთვლილი დაავადებების პროფილაქტიკას.
    დაავადებების თავიდან აცილებისა და პროფილაქტიკის თვალსაზრისით ძალიან მნიშვნელოვანია მშობლების მიერ ჯანსაღი ცხოვრების წესის ელემენტარული ცოდნა.

მოდით ერთად გავარკვიოთ ბავშვთა დაავადებების გამომწვევი მიზეზები, შევისწავლოთ დაავადებათა პროფილაქტიკის საფუძვლები, მივყვეთ ჯანსაღი ცხოვრების წესს, ხოლო ბავშვის ავადმყოფობის შემთხვევაში, დაჟინებით გთხოვთ თავი შეიკავოთ თვითმკურნალობისგან და მიმართოთ ექიმს.