ხშირად მშობლები ამ ასაკის ბავშვის ”ცუდი ქცევის” შემთხვევაში მრისხანე ტონით მიმართავენ: ”შენ მოიქცევი კარგად?” ან ”როგორ უნდა იქცეოდე?”. შეკითხვის ფორმით გამოთქმული მშობლის უკმაყოფილება ბავშვისათვის სრულიად გაუგებარია. ესაუბრეთ ბავშვს მისთვის გასაგები ენით, გააგებინეთ კონკრეტულად რა გინდათ მისგან. მაგალითად: ”მისმინე” ან ”უსმინე”; ”მიყურე” ან ”უყურე”; ”გააკეთე ასე”. ასეთი მიმართვა მისთვის გასაგებია, ხოლო წინა წინადადებაში მოცემული ფრაზეოლოგია მისთვის გაუგებარია, იმიტომ, რომ გაუგებარია თვით სიტყვები: ”შენ - მოიქცე” ან რას ნიშნავს - ”როგორ იქცევი?”. ამ ასაკში შესაძლებელია გასაგები ენით აუხსნათ ბავშვს საზოგადოებრივ ადგილებში ქცევის წესები, მაგრამ ჯობია ეს გააკეთოთ სახლში ან სახლიდან გასვლამდე და არა გარეთ. არ გამოგვივიდეს ისე, რომ ჯერ ბავშვმა რაღაც არა სწორედ გააკეთა და მერე ვასწავლით მას თუ როგორ უნდა მოიქცეს.