გასაუბრება.
იცოდეთ, რომ თქვენი შეფასება იწყება გასაუბრების დაწყებამდე - იმ წამიდან, როცა შეაღებთ ოფისის კარებს. გასაუბრებაზე, როგორც წესი, დაგვიანების გარეშე რამდენიმე წუთით ადრე უნდა მიხვიდეთ და მის დაწყებამდე დარჩენილი თავისუფალი დრო თვით მობილიზებასა და საუბრისათვის მომზადებას უნდა მოახმაროთ. ინტერვიუს მოლოდინში არ გირჩევთ მომზადებულ ჩანაწერებსა თუ პირად დოკუმენტებში ქექვას, ამან შეიძლება დაგაბნიოთ, არეულობა შეიტანოს თქვენს მიერ წინასწარ გააზრებულ მწყობრ თვით პრეზენტაციაში ან და ზედმეტი ფუსფუსით ნერვიული ადამიანის შთაბეჭდილებას შექმნით. ჯობია წყნარად გადაავლოთ თვალი სარეკლამო პროსპექტებს ან ჟურნალებს, რომლებიც უხვადაა ხოლმე მისაღებ ან მოლაპარაკების ოთახებში. ასეთი ქცევა მეტ ნდობას გამოიწვევს თქვენს მიმართ და გასაუბრების ორგანიზატორებს დაარწმუნებს იმაში, რომ იოლად შეგიძლიათ დაძლიოთ სტრესული სიტუაციები. გასაუბრების ოთახში ან კაბინეტში შესვლის დროს ნუ დააკაკუნებთ კარებზე და ნუ შეიჭყიტებით შეშინებული თვალებით შესვლის ნებართვის მისაღებად. შებრძანდით დინჯად, გასაუბრების ჩამტარებელს მიესალმეთ თავდაჯერებულად და იმავდროულად გულწრფელად. არ დაუსვათ შეკითხვა - სად დავჯდე? თუ არ შემოგთავაზეს დაჯდომა, მისალმებისთანავე არ დაიწყოთ საუბარი, ინტერვიუერის გვერდით თვითონ შეარჩიეთ თქვენთვის მოსახერხებელი სკამი და მშვიდად დაბრძანდით. ნუ ამოირჩევთ ძალიან რბილ სავარძელს ან დივანს, ასეთი ავეჯი მოუხერხებელია დასაჯდომად, საუბრის წარმართვისათვის და მისი დასრულების შემდეგ ასადგომად. პორტფელი ან საქაღალდე, ხელთ თუ გიჭირავთ, არ დაიწყოთ მათი ნერვიული წეწვა. იცოდეთ, რომ სხვა მიზეზებთან ერთად, გასაუბრების შედეგად უარს ხშირად გადაჭარბებული ნერვოზულობის გამოც ეუბნებიან, და დაბნეულობასა ან კონცენტრირების უნარის უქონლობათ აღიქვავენ. თუ ინტერვიუერს, საუბრის პროცესში, მოულოდნელად დაურეკეს ტელეფონზე, ნუ გაღიზიანდებით, გააკეთეთ მისთვის ხელსაყრელი პაუზა, მაგრამ არ შესთავაზოთ, რომ სატელეფონო საუბრის დასრულებამდე დატოვებთ ოთახს. არ არის გამორიცხული, რომ განძრახ ამოწმებენ, როგორ რეაგირებთ თქვენ ოფისში მუშაობის მშვიდი რიტმის დარღვევაზე. პაუზის დროს წყნარად, აუღელვებლად კვლავ გადაათვალიერეთ ჟურნალი, სარეკლამო პროსპექტი ან თქვენ მიერ წინასწარ მომზადებული ”შპარგალკა”. თუ ინტერვიუერი ტელეფონის საუბრის დასრულების შემდეგ უცბად არ განაახლებს თქვენთან ურთიერთობას, აცადეთ მოკლე ხანი, რომ დაუბრუნდეს გასაუბრების არეალს. ხოლო, თუ პაუზა გაუგრძელდა, თქვენთვის ხელსაყრელი საკითხიდან საუბრის გაგრძელების ინიციატივა თვითონ აიღეთ ხელთ. ინტერვიუერის მიერ გასაუბრების პირველადი შედეგების შეჯამებისა და დასრულების შემდეგ გამოხატეთ კმაყოფილება და მადლიერება ჩატარებული გასაუბრების გამო, დაემშვიდობეთ. გახსოვდეთ, რომ ამასაც კი აქვს მნიშვნელობა რამდენად შესძლებთ ღირსეულ და თავდაჯერებულ დამშვიდობებას, ადგომასა და ოთახიდან გასვლას, იმიტომ, რომ თქვენ მიმართ დაკვირვება სრულდება მხოლოდ მაშინ, როდესაც მიიხურავთ კარებს. თუ თქვენ იქვე არ გაცნობეს გასაუბრების შედეგი, გასვლამდე სასურველია გამოთქვათ იმედი, რომ განხილვის შედეგად აუცილებლად დაგიკავშირდებიან.

გასაუბრების გავლისა და შემდგომი კარიერისათვის ძალზე მნიშვნელოვანია თუ რა შთაბეჭდილებას ახდენთ თქვენ გარემოცვაზე, ცალკეულ ადამიანებზე, ანუ როგორია და როგორი უნდა იყოს თქვენი პერსონალური იმიჯი. პირადი იმიჯის შემადგენელი და შემქმნელი ორგანული კომპონენტებისა და სხვა საინტერესო ასპექტების თაობაზე, თქვენი დაინტერესების შემთხვევაში, დამატებითად დეტალურად განგიმარტავთ. მოგვწერეთ, თუ თქვენ დაგაინტერესებთ ეს თემა.
და კიდევ ერთი ფრიად მნიშვნელოვანი ასპექტის შესახებ.როგორც სამსახურის მოპოვების, ასევე შემდგომი კარიერის დროს თქვენ წინაშე დადგება მეტად სერიოზული და მნიშვნელოვანი პრობლემა - როგორ უნდა წარმოვადგინოთ საკუთარი თავი. იმის შემდეგ, როდესაც დაეუფლებით გასაუბრების არა მხოლოდ გავლის, არამედ თანამონაწილეობის ტექნიკას, ჩვენი დახმარებით თვითონვე შესძლებთ არსებული პირადი იმიჯის გაანალიზებასა და მასში კორექტივების შეტანას. თუ ეს თქვენთის საინტერესოა, მოგვმართეთ - ჩვენ შეგასწავლით თვითპრეზენტაციის ბევრ საიდუმლოებასაც.