საბავშვო ბაღების ვაუჩერიზაციის საპილოტო პროგრამა 2009 წელს დაიწყო და თბილისის 9 საბავშვო ბაღში წარმატებით განხორციელდა.
ვაუჩერიზაცია საბავშვო ბაღების ინდივიდუალურ დაფინანსებას გულისხმობს. თითოეულ ბავშვზე წლის განმავლობაში საშუალოდ 800 ლარი გამოიყოფა და ბაღის ბიუჯეტს დირექტორი მშობლებისა და მასწავლებლებისაგან დაკომპლექტებული სამეურვეო საბჭოს დახმარებით განკარგავს.

ბიუჯეტის დეცენტრალიზაციითა და სწორი მენეჯმენტის საშუალებით ბაღები   სწრაფად და ეფექტურად შეძლებენ ადგილზე წარმოქმნილი პრობლემების გადაჭრას. რაც შეეხება საბავშვო ბაღების კაპიტალურ რემონტსა და სრულ ინვენტარიზაციას, ამას ქალაქის მერია   ცენტრალური ბიუჯეტიდან უზრუნველყოფს.
დაფინანსების ახალ სისტემაზე გადასვლასთან დაკავშირებით, მერიის ინიციატივით, საბავშვო ბაღების   დირექტორებსა და ბუღალტრებს საფინანსო-ეკონომიური დარგის სპეციალისტების მიერ შესაბამისი ტრეინინგები ჩაუტარდათ. მოწვეული ექსპერტები ბაღის თანამშრომლებს ვაუჩერიზაციასთან დაკავშირებულ საკითხებზე უფასო კონსულტაციებს მთელი წლის განმავლობაში გაუწევენ.

1 ოქტომბრიდან ინდივიდუალური დაფინანსების ახალ სისტემაზე მუნიციპალურ დაქვემდებარებაში მყოფი ყველა საბავშვო ბაღი გადავიდა.

წყარო: http://www.tbilisi.gov.ge