სამაგისტრო და სადოქტორო პროგრამებზე ჩაბარების პროცედურა და წესი განსხვავდება საბაკალავრო პროგრამების  მოთხოვნებისაგან. შეიძლება ითქვას, რომ მაგისტრატურისა და დოქტორანტურის პროგრამებში პრეტენდენტისადმი მიდგომა უფრო ინდივიდუალური ხასიათისაა.

მაგისტრატურის პროგრამაზე (სწავლის ხანგრძლიობა 1 – 2 წელი) ჩაბარებისთვის საჭირო იქნება სპეციალური, GRE ან GMAT ტიპის, ენობრივი ტესტების ჩაბარება, რომელიც გათვალისწინებულია დიპლომის შემდგომი პროგრამების მონაწილეებისთვის. მოთხოვნა ინგლისური ენის ცოდნის მხრივ ბაკალავრიატთან შედარებით საგრძნობლად მაღალია და მოითხოვს სპეციალობასთან დაკავშირებული ტერმინოლოგიის კარგ ცოდნას. სამაგისტრო პროგრამაზე ჩაბარების მსურველმა უნდა წარადგინოს უმაღლესი განათლების დამადასტურებელი დოკუმენტი. როგორც წესია მაგისტრატურის პროგრამაზე მოსახვედრად საკმარისია 4 წლიანი საბაკალავრო პროგრამის დამთავრების დიპლომი. ცალკეულ შემთხვევაში შესაძლოა საჭირო გახდეს  მუშაობის გამოცდილების დადასტურებაც, აგრეთვე რეკომენდაციების წარდგენა. გარდა ამისა, უნდა იცოდეთ, რომ განხილვის პროცესში სერიოზულ ყურადღებას აქცევენ სამაგისტრო პროგრამაზე მოხვედრის მსურველთა მახასიათებელ პირად თვისებებს. სამაგისტრო პროგრამაზე მონდომებითა და ნიჭით გამორჩეული სტუდენტისთვის სტიპენდიის, მ.შ. სწავლის  ხარჯების დაფარვის მაღალი პროცენტის მქონე სტიპენდიის, მიღების შანსი უფრო რეალურია ვიდრე საბაკალავრო პროგრამებზე.

სადოქტორო პროგრამებზე (სწავლის ხანგრძლიობა 3 – 4 წელი) ჩაბარება საკმაოდ ინდივიდუალური პროცესია. ჩაბარების პროცედურაში ძალიან მნიშვნელოვანია სამეცნიერო ხელმძღვანელის მოძებნა. მისი მოძებნა შესაძლებელია საერთაშორისო სამეცნიერო ჟურნალებში გამოქვეყნებული პუბლიკაციების, ქართველი მეცნიერების დახმარების და სხვა შესაძლო წყაროების მეშვეობით. უპრიანია შეარჩიოთ რამდენიმე პროფესორი, რომელთა სამეცნიერო მოღვაწეობა და ინტერესები ემთხვევა ან უახლოვდება თქვენი მომავალი დისერტაციის თემას თუ პრობლემატიკას. შერჩეულ კანდიდატებს  (უხერხულობის თავიდან აცილებისათვის ალბათ რიგ-რიგობით) თანხმობის თაობაზე თხოვნით უნდა მიმართოთ წერილობითი ფორმით. რამდენიმე სავარაუდო ადრესატი კი საჭიროა იმიტომ, რომ შესაძლოა ყველამ არ გამოიჩინოს ინტერესი თემისა ან თქვენს მიმართ, გარდა ამისა ზოგმა უარი შეძლება განმარტოს თავისი მოუცლელობით. ამის გარდა, სადოქტორო პროგრამაზე მოხვედრის მსურველს აუცილებლად დასაწერი ექნება კვლევის პროექტის დასაბუთება (Research Proposal ან Research Statement). და კიდევ ერთი სასარგებლო ინფორმაცია სადოქტორო პროგრამებზე ჩაბარების პრეტენდენტებისთვის: დოქტორანტურის პროგრამები საზღვარგარეთ ძირითადად ემსახურებიან მეცნიერთა და პედაგოგთა მომზადებას. როგორც წესია, ამ სახის პროგრამა სრულდება PhD ან ანალოგიური ხარისხით. სადოქტორო პროგრამები ითვალისწინებენ 3-4 წლის განმავლობაში სერიოზულ კვლევით მუშაობას, შერჩეული უმაღლესი სასწავლებლის პროფესორის ხელმძღვანელობთ, რომელიც უნდა დასრულდეს დისერტაციის დაწერითა და დაცვით. სამეცნიერო კვლევისათვისა და დისერტაციისათვის აქტუალური თემის წარდგენა ბევრად ზრდის სრული სტიპენდიის (ან გრანტის) მიღების ისედაც მაღალ შანსს.
ამ რუბრიკის შემდგომ პუბლიკაციებში, რა თქმა უნდა თუ დაგაინტერესებთ, დეტალურად მოგითხრობთ საგანმანათლებლო სააგენტოების, სხვა და სხვა ქვეყნებსა და უმაღლეს სასწავლებლებში სწავლის ღირებულების, სტიპენდიის მიღების, აგრეთვე გაცვლითი და საგრანტო პროგრამების შესახებ.