დასკვნამდე, რომ ინტერნეტმა სიკეთის გარდა   თან მოიტანა საფრთხეები, მივიდნენ ლიდსის უნივერსიტეტის სპეციალისტები, რომლებმაც ჩაატარეს სპეციალური კვლევა, რათა დაედგინათ ადამიანების გარკვეულ ასაკობრივ კატეგორიაში გახშირებული დეპრესიის სიმპტომების ინტერნეტის მოხმარებასთან კავშირი.

მეცნიერებმა გაარკვიეს, რომ ამ სახის ფსიქიკური დარღვევები ყველაზე ხშირად შეიმჩნევა იმ ადამიანთა შორის, რომლებიც ძალიან დიდი დროის განმავლობაში იმყოფებიან ონლაინ სივრცეში და ვერ აკონტროლებენ ინტერნეტში ყოფნის ხანგრძლიობას. ამ კატეგორიის ადამიანებისათვის ინტერნეტი ასრულებს თავისებური ნარკოტიკის როლს, მათ უვითარდება არა მხოლოდ მუდმივი მოხმარების მოთხოვნილება, არამედ დამოკიდებულების სინდრომი, რომელიც ძალიან წააგავს ფსიქოაქტიური ნივთიერებების ჭარბ მოხმარებას. ინტერნეტით შეუზღუდავი და გადამეტებული სარგებლობა ხშირ შემთხვევაში იწვევს სტრესებს და შეიძლება მიაყენოს ზიანი არა მხოლოდ ფიზიკურ და ფსიქოლოგიურ ჯანმრთელობას, არამედ ადამიანის სოციალურ სტატუსს. მით უფრო, რომ ინტერნეტ - დამოკიდებულების მოვლენა შეიმჩნევა ახალგაზრდა ადამიანებში, რომელთა საშუალო ასაკი წარმოადგენს 21 წელს.

ინტერნეტის მომხმარებელთა ნაწილის ვირტუალური სივრცით გატაცება მიდის იქამდე, რომ ისინი დღე-ღამეში კომპუტერთან ატარებენ 18 – 20 საათს. ამ სახის დამოკიდებულება ემსგავსება თამაშების უკვე საყოველთაოდ აღიარებულ მანიას. განსხვავებული მონაცემებით დღეს მსოფლიოში ყოველი მეათე მომხმარებელი ავლენს დამოკიდებულებას ინტერნეტის მიმართ.   დაკვირვებამ უჩვენა, რომ ინტერნეტის მოხმარებაზე მკვეთრი უარის თქმა მათში იწვევს მღელვარებასა და ემოციურ აგზნებადობას.

რა ქმნის ამგვარ დამოკიდებულებას? სპეციალისტების აზრით, თუ ამ სახის დამოკიდებულება არ არის გამოწვეული ინტერნეტ - თამაშებით, მისი ძირითადი მიზეზია ვებ-სერფინგის, ახალი ინფორმაციის მიღების,   ვირტუალური ურთიერთობის, ქსელებში გაცნობისა და ინტრნეტ-შოპინგის უკონტროლო და უსაზღვრო წყურვილი.    

მიუხედავად იმისა, რომ ექსპერტთა ერთი ნაწილი უარყოფს იმას, რომ ინტერნეტით გადამეტებულმა გატაცებამ შეიძლება მიაყენოს საგრძნობი ზიანი ადამიანის ფიზიკურ თუ ფსიქიკურ ჯანმრთელობას, ზოგი ექსპერტი მაინც ურჩევს ამ კატეგორიის მომხმარებლებს გამოიჩინონ სიფრთხილე, რათა ინტერნეტში ბრაუზერთან ან რომელიმე საიტთან მიერთების დაბალი სიჩქარის გამო, საკუთარი თავი არ მიიყვანონ სტრესამდე და ნერვიულ შერყევამდე. ანუ გვირჩევენ გამოვიჩინოთ სიფრთხილე.