ფსიქოლოგიური მდგომარეობის, ხასიათის, თვისებების ან განწყობის სხვა და სხვა განზომილებით შესწავლისა და დადგენისათვის დღეისათვის გამოიყენება მრავალი განსხვავებული  მეთოდიკა. ზოგიერთ მათგანს, მაგალითად, ლირის და აიზენკის მეთოდიკურ მიდგომებს, თქვენ უკვე გაგაცანით. ტესტ - ანტისტრესის გავლით, რომელსაც ამჟამად გთავაზობთ, თქვენ შესძლებთ სულ სხვა მიდგომით შეაფასოთ საკუთარი ფსიქოლოგიური მდგომარეობა და ერთი კვირის განმავლობაში დაადგინოთ თქვენთვის აქტუალური რისკის ფაქტორები. პორტალის მომხმარებელთა შორის ჩატარდა მცირე გამოკითხვა - „შევაფასოთ ჩვენი ფსიქოლოგიური მდგომარეობა.“ ნახევარზე მეტმა რესპონდენტმა აღნიშნა, რომ „განიცდის მოუსვენრობას, დაძაბულობას“, ან ”ხშირად აქვს ცუდი განწყობა“, ანუ იმყოფება რთულ, თითქმის სტრესულ მდგომარეობაში. მოსალოდნელი გართულების თავიდან აცილებისთვის კვირის განმავლობაში საღამოობით გაიარეთ ტესტი. ყოველდღიური პასუხების შეჯერებით გამოავლინეთ სიტუაციის შესაძლო განვითარების ტენდენცია, აგრეთვე, იმ პუნქტების მიმართ, რომლებზეც უმეტესად გაეცით დადებითი პასუხები, გააკეთეთ შესატყვისი დასკვნები. შეგვიძლია მოგცეთ რჩევა: თუ შეუძლებელია რომელიმე რისკის ფაქტორების სრული მოცილება, ეცადეთ „გააზავოთ“ ისინი დადებითი ემოციებით - უფრო ხშირად უსმინეთ მუსიკას, იმღერეთ, იკითხეთ ლირიკული პოეზია, დაუახლოვდით ბუნებას და ა.შ.

მოდით შევაფასოთ რისკის ფაქტორები, გავიაროთ ტესტი.