ქრისტიანულ სამყაროში ქრისტესშობა ითვლება უდიდეს დღესასწაულად. მას აღნიშნავენ მთელ მსოფლიოში. მაგრამ ,ხშირ შემთხვევაში, ბევრ ქვეყანასა და ერს გააჩნია საკუთარი განსხვავებული ტრადიციები.

ფინეთში ქრისტესშობის აღნიშვნის პერიოდი იწყება შობამდე ხუთი კვირა დღით ადრე. სახლში უნდა დაიდგას მორთული ნაძვის ხე, რომელზეც აანთებენ სანთლებს.  ამ დღეს მიღებული იყო ციგებით სრიალი, ტრადიციის შესაბამისად ჩიტებისთვის ქუჩაში გაჰქონდათ შვრიის ორიოდე ძნა, სახლის იატაკზე და სუფრის გადასაფარებლის ქვეშ აფენდნენ ნამჯას. დაფენამდე რამდენიმე მუჭა ნამჯას ისროდნენ ჭერისკენ და მკითხაობდნენ დამდეგი წლის მოსავლიანობაზე. შობის ღამეს ყველას იატაკზე დაფენილ ნამჯაზე ეძინა. წინადღეს იკრიბებოდა მთელი ოჯახი. მიღებული იყო სასაფლაოზე გასვლა და ახლობლების საფლავებზე სანთლის დანთება. ამჟამად საღამოს ხუთი საათისთვის ზოგიერთი ოჯახი მიემართება ეკლესიაში, ზოგი კი ღვთისმსახურებას ტელევიზიით უყურებს. ამის შემდეგ იშლება სუფრა. წლის ყველაზე მნიშვნელოვანი დღესასწაულისთვის - შობისთვის მომზადება იწყება მეგობრებსა და ნათესავებისთვის საჩუქრების ყიდვით, სახლის დალაგებით და მორთვით. აგრეთვე გალამაზებული და მორთულია მაღაზიები, ქუჩები, საზოგადოებრივი თავშეყრის ადგილები. ტარდება საშობაო კონცერტები.  

გასული საუკუნის ოციანი წლებიდან ფინელები აღნიშნავენ ეგრეთწოდებულ ”მცირე შობას”. საფუძველი ამ ტრადიციას ქალთა ორგანიზაციებმა ჩაუყარეს, რომლებიც შობის წინ აწყობდნენ საშობაო ბაზრობას და ამ ბაზრობისთვის ამზადებდნენ  ხელნაკეთ სუვენირებს, სხვა და სხვა სახის მოსართავებს. დღეს, ხშირ შემთხვევაში, ”მცირე შობას” აღნიშნავენ კორპორატიული ვახშმის სახით, კომპანიის თანამშრომლები ამზადებენ სპეციალურ მუსიკალურ და საზეიმო გამოსვლას. ჩვეულებრივ ასეთ შეკრებაზე ქმრებსა და ცოლებს არ პატიჟობენ. ერთ-ერთ განსაკუთრებულ, ფინურ საშობაო ჩვეულებად იქცა საღამოს საუნა, რომლის შემდეგ  ოჯახი სუფრასთან იკრიბება. საშობაო სადილი მდიდარია განსხვავებული კერძებით.  სადილის დროს მიირთმევენ გლინტვეინს. ფინეთში შობის დღეს აღნიშნავენ ძალიან მშვიდად, ოჯახში და ეკლესიაში. ხოლო მეორე დღეს აწყობენ მასობრივ სეირნობას. მეგობრები იკრიბებიან რესტორნებში ან დადიან სტუმრად.