ჟურნალში „Proceedings of the National Academy of Sciences“ გამოქვეყნებულ სტატიაში მეცნიერთა ჯგუფი ასაბუთებს ფრიად საინტერესო დასკვნას: თურმე 3 - დან 11 წლამდე ასაკის ბავშვის თვითკონტროლის დონე პირდაპირ კავშირშია მის წარმატებულობასთან საქმიანობასა და ოჯახურ ცხოვრებაში ზრდასრულ ასაკში. თავის კვლევაში ამერიკის შეერთებული შტატების დიუკის უნივერსიტეტის მეცნიერები  ზრდასრული ადამიანის წარმატებულობას აფასებდნენ რამდენიმე პარამეტრის, მათ შორის ჯანმრთელობის მდგომარეობისა და კეთილდღეობის დონის მეშვეობით. მათი დაკვირვებით ბავშვის თვითკონტროლის დონის გათვალისწინებით შესაძლებელია   შემდგომ ცხოვრებაში მისი წარმატებულობის „წინასწარმეტყველება“.

 მსოფლიოს მრავალი ქვეყნის წამყვანი უნივერსიტეტებისა და სპეციალიზირებული ცენტრების მიერ ჩატარებულია მრავალი კვლევა, გამოცემულია უამრავი ნაშრომი და წიგნი ბავშვთა ფსიქოლოგიის თაობაზე. სამწუხაროდ ამ ნაშრომებისა და პუბლიკაციების მცირედი ნაწილიც კი არ მოიპოვება ჩვენ წიგნების მაღაზიებში და ვინაიდან არ არის ქართულ ენაზე თარგმნილი - არ არის ქართველი მშობლებისათვის ხელმისაწვდომი. ამ სახის ნაშრომებიდან ვეცდებით ზოგადადმაინც შეგიქმნათ წარმოდგენა პირველ რიგში ბავშვის ფსიქიკური განვითარების შესახებ.

ბავშვის განვითარების ყველა ეტაპს მოჰყვება შესაბამისი ასაკობრივი კრიზისები. კრიზისი, კანონზომიერი მოვლენაა ბავშვის ცხოვრების გარკვეულ ეტაპზე. ის გამოწვეულია იმით, რომ თვითოეული ბავშვის განვითარების პროცესში ხდება გამოცდილების და განვითარებით გამოწვეული ცვლილებების დაგროვება და ბავშვის თავის განვითარებაში გადადის თვისობრივად ახალ ეტაპზე. თქვენი შვილის ცხოვრებაში ამ კრიტიკული მომენტების ცოდნა დაგეხმარებათ უფრო უმტკივნეულოდ გაიაროთ ეს პროცესები.

ბავშვის ცხოვრება - საოცარი, მაგრამ არც თუ ისე უდარდელი სამყაროა. ის, რაც ცხოვრებაში თვითოეული ჩვენთაგანისათვის ყოვლად გასაგებია, ბავშვისათვის ყოველდღიური აღმოჩენის საგანს წარმოადგენს. ბავშვი თავიდან სწავლობს ყველაფერს, რაც ჩვენთვის ცხადზე ცხადია.