ამ თაობის სახელწოდებას  საკმაოდ საინტერესო ისტორია გააჩნია. თქვენთვის წინა პუბლიკაციიდან უკვე ნაცნობმა უილიამ შტრაუსმა და ნილ ჰოუვმა მას "თაობა 13" უწოდეს. თავად ტერმინი "X თაობა" პირველად გამოიყენა   სტუდენტი ახალგაზრდობის  მკვლევარმა ინგლისელმა ჯეინ დევერსონმა, შემდეგ თავის წიგნში "Generation X"  ჰოლივუდერმა კორესპონდენტმა ჩარლზ ჰამბლეტმა. ფართოდ   ის გავრცელდა კანადელი მწერლის დუგლას კოპლენდის ამავე სახელწოდების წიგნის წყალობით. მოგვიანებით როგორც ტერმინი ის მყარად დამკვიდრდა დემოგრაფიაში, საზოგადოებრივ მეცნიერებებსა და მარკეტინგში.

X თაობის ზოგადი მახასიათებლები

რა თქმა უნდა, თაობათა დაყოფა დაბადების თარიღების მიხედვით არ შეიძლება იყოს უდაო და აბსოლუტურად ზუსტი. სავარაუდოდ, მათ ღირებულებათა  ორიენტირებში  „წყალგამყოფის“ დადგენაც ალბათ უნაკლოდ არ უნდა ჩაითვალოს.

ამის მიუხედავად, ჩვენი წინა პუბლიკაციიდან გამომდინარე, მაინც გვსურს შეგახსენოთ, რომ მიღებული გრადაციის მიხედვით, X თაობა მოიცავს 1967 წლიდან 1984 წლამდე დაბადებულ და ერთნაირ პირობებში გაზრდილ ადამიანებს. ასევე უნდა გავიხსენოთ, რომ უმეტეს შემთხვევაში თაობები ყალიბდებიან წინა პოპულაციის  ღირებულებათა მიღებისა და გაზიარების, ან კორექტირების თუ უარყოფის პროცესში.

ერთი და იგივე თაობის (მათ შორის X-ის) ადამიანები აგროვებენ ერთგვაროვან ცხოვრებისეულ გამოცდილებას, ქმნიან განზოგადებული „მახასიათებლების კოლექტიურ პორტრეტს“ და ცხოვრობენ მსგავსი „ცხოვრებისეული სცენარების“ მიხედვით, ახდენენ ერთნაირ მახასიათებელთა, უპირატესობათა და ფასეულობათა დემონსტრირებას.

X თაობას, უმეტესწილად, წარმოადგენენ ადამიანები, რომლებმაც, შეიძლება ითქვას, თითქმის სრულიად დაკარგეს რწმენა ყველაფრის   - მშობლების, სოციალური ინსტიტუტების, საზოგადოებრივი ცხოვრების მოწყობის მიმართ. ისინი უფრო პრაგმატულები, ვიდრე რომანტიკულები არიან.

მათი მთავარი განმასხვავებელი თვისება გამოიხატება იმაში, რომ ისინი ძალიან დამოუკიდებლები არიან, რადგან იზრდებოდნენ სრულიად ავტონომიურ და დამოუკიდებელ პირობებში   - არავის, მათ შორის მშობლებს, არ უთქვამთ, როდის, სად და რა ეკეთებინათ. ამიტომ, ამ თაობის წარმომადგენლები მოქმედებენ მხოლოდ საკუთარ შესაძლებლობებზე დაყრდნობით, საფუძვლიანად იკვლევენ ყველაფერს, რასაც აკეთებენ, ამავდროულად ცდილობენ სასარგებლო კონტაქტების დამყარებას, ოღონდ   არ სურთ ინფორმაციის გაზიარება (მათთვის ინფორმაცია ძალიან მნიშვნელოვანი ღირებულებაა).

დაბადების თარიღიდან  გამომდინარე მათი სწავლა-განათლებისა და   კარიერის დაწყების პერიოდი მიმდინარეობდა ინტერნეტის არ არსებობის პირობებში, ხოლო თანამედროვე ტექნოლოგიებმა მათ ცხოვრებაში  შემოაღწიეს უკვე შემდგომ პერიოდში. ამის მიუხედავად, X თაობის ადამიანებმა შეძლეს გლობალური ცვლილებებისა და ტექნოლოგიური ინოვაციების დანერგვის ეპოქაში ღირსეულად შესვლა.

ცხოვრებისეულმა პრაქტიკამ აჩვენა, რომ ამ თაობის წარმომადგენლებს ახასიათებთ და შეუძლიათ ალტერნატიული აზროვნება, მრავალი სიახლისა და შესაძლებლობის ათვისება რათა მოერგონ რეალურ პირობებს.

კორპორატიულ იერარქიაში კარიერული ზრდისა და სტაბილურობის მისაღწევად X თაობის  უმეტეს წარმომადგელს შეუძლია იშრომოს ყოველდღიურად და დაძაბულად ცხოვრებისეულ ზოგ სიამოვნებაზე უვარის თქმის ხარჯზეც კი.

ისინი არ იზიარებენ ბები-ბუმერების თაობის ბევრ კონსერვატიულ ღირებულებას. ხელმძღვანელობენ დევიზით - „ცხოვრებაში ყველაფერი ბრძოლით მიიღწევა“  და საკმაოდ აგრესიულად ცვლიან   ბუმერების თაობის ადამიანებს ხელმძღვანელ თანამდებობზე, მმართველ პოზიციებზე, რის შედეგადაც, სახელმწიფო სტრუქტურებისა და კომპანიების ხელმძღვანელობაში ამჟამად დომინირებს X თაობა, რომელიც, ამავდროულად, არ გამორიცხავს „Y“ თაობის წარმომადგენელთა  რიგით თანამდებობებზე აყვანის შესაძლებლობას.   „X-ები“ აგრეთვე, ინტერპერსონალურ  ურთიერთობათა პრაქტიკული მომგებიანობის გათვალისწინებით, სათანადო ყურადღებას უთმობენ კორპორატიული კულტურისა და ეფექტური გუნდის ჩამოყალიბების ინტერესებს.

მატერიალური მდგომარეობა X-ებს აძლევს იმის შესაძლებლობას, რომ აწარმოონ საქმიანობა, რომელიც მოსწონთ, უწყვეტად განაგრძონ თვითგანათლება და გააჩნდეთ საკუთარი ჰობი.

ისინი აქტიურად იყენებენ ელექტრონულ საშუალებებს. მინიმუმ ერთ სოციალურ ქსელში აქვთ აქაუნთი. მუდმივად ადევნებენ თვალყურს  ონლაინ მაღაზიების შეთავაზებებს, თუმცა ფასდაკლების გათვალისწინებით ურჩევნიათ შოპინგი სავაჭრო ცენტრებში, რაც ხშირად იქცევა გადამწყვეტ ფაქტორად  შესასყიდი პროდუქტის თუ ნივთის არჩევისას.

ემოციურ განზომილებაში X თაობის უმეტესი წარმომადგენელი ისწრაფვის გრძნობების გულწრფელობისკენ, მზად არის აიღოს პასუხისმგებლობა ახლობელ ადამიანზე  თუნდაც საკუთარი ინტერესების საზიანოდ. X თაობის უმეტესობა ცდილობს რაც შეიძლება მყარად დაუახლოვდეს  შვილებს. კვლევებმა აჩვენეს, რომ X- მშობლები თავიანთ შვილებს ყველაზე უკეთეს და ახლო მეგობრებად თვლიან.

X თაობის კუმირებია: ბითლზი, ელვის პრესლი, მაიკლ ჯექსონი, ფრედი მერკური, ჩელენტანო, აბბა, ელტონ ჯონი, მადონა და რიგი კინოსა თუ თეატრის ვარსკვლავები.

თაობა X - ის პიროვნული თვისებები და თავისებურებები

X თაობის წარმომადგენლის პირად პორტრეტში ფსიქოლოგები აღნიშნავენ ისეთ თვისებებს, როგორიცაა:

·                 თავისუფალი აზროვნება

·                 პრაგმატიზმი

·                 დამოუკიდებლობა და თვითკმარისობა

·                 საკუთარი შესაძლებლობებისა და პოტენციური ძალების მტკიცე რწმენა

·                 მაღალი შრომისუნარიანობა

·                 პასუხისმგებლობის გრძნობა

·                 იდეალიზაციისკენ მიდრეკილება

·                 ტაქტიანობა

·                 კომუნიკაბელურობა

·                 თანამედროვე გამოწვევებთან ადაპტაციისა და   დროის მოთხოვნების შესაბამისად ცხოვრების ორგანიზების უნარი

·                 პატივისცემა მატერიალური და არა სულიერი ფასეულობების მიმართ

·                 საზოგადოებრივი პრობლემების გადაჭრის სურვილის უქონლობა, არნდომა

·                 ემოციური არამდგრადობა

·                 დეპრესიულობისადმი მიდრეკილება

·                 ამბიციურობა

X თაობის ადამიანი, როგორც წესი იზოგავს ფულს, იქმნის ფინანსურ ბალიშს და ახდენს ინვესტირებას უძრავ ქონებაში, რათა დაიცვას თავი მოულოდნელი გარემოებებისგან და უზრუნველყოს პენსიაზე გასვლის შემდგომი ცხოვრება. ეს არის რაციონალური და თადარიგიანი თაობა, რომელიც  სახსრებს  ძირითადად ხარჯავს  საკვებზე, მგზავრობასა და კომუნალურ მომსახურებაზე. ყიდვამდე საგულდაგულოდ არჩევენ შესასყიდ ნივთსა თუ საგანს. იქიდან გამომდინარე, რომ  საკუთარი თავი მათ მიაჩნიათ უნიკალურ ინდივიდად, ისინი უპირატესობას ანიჭებენ ექსკლუზიურ საქონელსა და მომსახურებას, მზად არიან რაციონალურად გამოიყენონ ფული, რათა დაზოგონ დრო, ან დახარჯონ კომფორტულობისათვის.

P.S. შემდეგ პუბლიკაციაში მოგიყვებით Y თაობის შესახებ